| Papill仔於2009年1月17日上午11時於粉嶺動物醫院離開了我們,醫生說Papill仔可能死於急性肺炎,而Papill仔的遺體已於下午5時10分於粉嶺寵物浩園火葬。 Papill仔已經跟了我們七年,我永遠都唔會忘記第一眼見到Papill仔的時候: 當時仲係住喺青衣居屋,一直都很想養一隻狗狗,但居屋嘛,唔俾養,點知有一晚,收工夜晚返到屋企,差唔多11點半,全屋人罰晒,燈熄晒,黑麻麻,一打開門見到有團黑影沖埋嚟,我仲以為老豆入元朗攞咗隻豬仔返嚟擋,點知一開燈見到係隻狗,又唔知點解屋企人又唔打俾我通知聲喎!嚇到我吖! 於又驚又喜的情況下,我開始試吓抱佢,可能佢見唔係主人返,所以佢一路呢埋,至於邊個係佢以前嘅主人,真係無從稽考,Papill仔係我舅父拎嚟架,佢話Papill仔係俾人遺棄架!我仲記得最初幾日抱佢佢會吠我架!但Papill仔衰在為食,俾嘢佢食佢就乜都得架啦!而呢個習慣一直都無改,我哋一開飯佢就會過嚟痴餐架啦! 講吓Papill仔嘅外型,佢D毛好靚,好少蝴蝶犬D毛會好似Papill仔果D咁靚,Papill仔D毛有齊黑、白、啡三種色,佢無乜牙,但唔係因為佢年紀大,而係唔知佢以前嘅主人點對佢,所以我哋唔會俾硬嘢俾佢食;佢條脷成日伸出嚟架,所以我哋成日笑佢喺度扮陳x希^^Papill仔唔鐘意剪腳甲,每次都要出動2~3個人先搞得掂@@ Papill仔有一對又圓又大嘅雙眼,而且又有黑邊圍住,好似畫咗eyeliner咁,永遠唔會忘記今朝早,佢對眼只能開到一半,我臨出門口前,佢猛咁伸長條頸望住我,可能佢知道果陣時已經係最後一眼見我,對唔住呀Papill仔,喺你最需要我時我唔喺你身邊,但就算每晚我幾夜返,你都一定會喺走廊度等我,就算有時你好倦,你都會喺廰度罰住等我,有時你好醒目,聽到有鎖匙聲知我返就會企定喺門口等我,永遠唔會忘記你見到我哋返屋企時跳跳澤個樣。 Papill仔好鐘意落街,每次知道會帶佢落去,佢會跳到好似隻兔仔咁,跳嚟跳去,我成日問佢"你係狗仔定兔仔嚟架?" 其實,Papill仔唔只係我嘅寵物,佢係我一個真心朋友,佢永遠唔會嫌棄我,當我失戀時,當我工作唔開心我喺度喊時,佢會儍更更咁望住我,我會抱起佢,同佢講“Papill仔,人哋離棄我唔緊要,但你一定唔可以離開我!”佢會好乖咁躺喺我懷裡面,任由我D眼淚滴濕佢D毛毛。 Papill仔,你一定要乖,依家你果度係唔係有好多朋友仔?你唔洗再驚架啦!你唔洗再睇你最驚嘅醫生架啦!Papill仔,如果你怕孤獨,有時間過嚟搵我哋,我哋永遠歡迎你返嚟!有一日我哋會相見架!到時唔好唔記得我,知無? 永遠愛你的知己 Vicky |